Çmimet globale të naftës kanë prekur sërish nivelin e 100 dollarëve për fuçi, ndërsa përshkallëzimi i luftimeve në Lindjen e Mesme ka tronditur tregjet dhe ka shtuar frikën për ndërprerje të furnizimeve.

Nafta Brent u rrit me 2.3%, duke arritur përkohësisht në 100 dollarë për fuçi. Në të njëjtën kohë, nafta amerikane WTI u tregtua rreth 94 dollarë për fuçi.

Shqetësimet kryesore lidhen me Ngushticën e Hormuzit, një nga rrugët më të rëndësishme për transportin global të naftës, ku lëvizja e tankerëve është vënë nën presion nga zhvillimet ushtarake. Të dy treguesit janë rritur me më shumë se 60% që nga fillimi i vitit, ndërsa rritja e çmimit po reflektohet edhe te karburantet dhe po shton presionin mbi inflacionin në ekonomitë globale.