Pesë ditë para verdiktit të Gjykatës Speciale, Lëvizja Vetëvendosje ka dalë me një reagim publik kundër ish-presidentit Hashim Thaçi dhe personave që votuan për themelimin e kësaj gjykate.

VV-ja ka kërkuar që Thaçi dhe të tjerët që e themeluan Gjykatën Speciale t’i kërkojnë falje popullit të Kosovës dhe mbarë kombit shqiptar. Në reagimin e saj, lëvizja e ka cilësuar themelimin e gjykatës si dëmin më të madh që i është bërë historisë së luftës çlirimtare dhe themeleve të shtetit të Kosovës.

Vetëvendosje ka bërë të ditur gjithashtu se e mbështet “Marshin për Liri”, i cili është paralajmëruar të mbahet më 12 shtator në Prishtinë. Sipas reagimit të VV-së, marshi do të zhvillohet kundër atyre që e themeluan Gjykatën Speciale.

Gjykata Speciale pritet të japë verdiktin pesë ditë pas këtij reagimi, ndërsa VV-ja ka përsëritur qëndrimin se kjo gjykatë e ka padrejtësinë në themelin e saj.